ஜனாதிபதி அநுர குமார திஸாநாயக்க அடுத்த வாரம் மட்டக்களப்பு மற்றும் அம்பாறைக்கு விஜயம் 

அரசாங்க தகவல் திணைக்களத்தின் தெரிவிப்பின்படி, ஜனாதிபதி அநுர குமார திஸாநாயக்க அடுத்த வாரம் மே 20 மற்றும் 22 ஆகிய திகதிகளில் மட்டக்களப்பு மற்றும் அம்பாறை மாவட்டங்களுக்கான உத்தியோகபூர்வ விஜயமொன்றை மேற்கொள்ளவுள்ளார்.

இந்த விஜயத்தின் போது, ஜனாதிபதி மாவட்ட ஒருங்கிணைப்புக் குழுக் கூட்டங்கள் மற்றும் அபிவிருத்தி தொடர்பான நிகழ்வுகள் உள்ளிட்ட தொடர்ச்சியான உத்தியோகபூர்வ நிகழ்வுகளில் கலந்துகொள்ளவுள்ளார்.

மே 20 – ஜனாதிபதி திஸாநாயக்க மட்டக்களப்பு பழைய மாவட்ட செயலக கேட்போர் கூடத்தில் நடைபெறவுள்ள மட்டக்களப்பு மாவட்ட ஒருங்கிணைப்புக் குழுக் கூட்டத்தில் கலந்துகொள்ளவுள்ளார். அதனைத் தொடர்ந்து, மட்டக்களப்பு வெபர் மைதானத்தில் (Weber Stadium) போதைப்பொருள் ஒழிப்பை நோக்கமாகக் கொண்டு நடத்தப்படும் ‘நாடே ஒன்றாக’ தேசிய வேலைத்திட்டத்திலும் அவர் பங்கேற்கவுள்ளார்.

மே 22 – ஜனாதிபதி நிந்தவூர் கலாசார நிலையத்திற்கான அடிக்கல்லை நாட்டவுள்ளதுடன், அம்பாறை நகரில் புதிய வர்த்தக வளாகம் ஒன்றின் கட்டுமானப் பணிகளையும் ஆரம்பித்து வைக்கவுள்ளார்.

அதன்பின்னர், அம்பாறை மாவட்ட செயலக கேட்போர் கூடத்தில் நடைபெறும் அம்பாறை மாவட்ட ஒருங்கிணைப்புக் குழுக் கூட்டத்தில் கலந்துகொண்டு தனது விஜயத்தை நிறைவு செய்யவுள்ளார்.