மர்மமான முறையில் உயிரிழந்த நிதி அமைச்சக அதிகாரி; காரணம் $2.5 மில்லியன் சைபர் திருட்டு?

இலங்கையில் இடம்பெற்ற 2.5 மில்லியன் அமெரிக்க டாலர் (சுமார் ரூ. 80 கோடி+) சைபர் திருட்டு சம்பவம் தொடர்பாக நிதி அமைச்சக அதிகாரி ஒருவர் உயிரிழந்துள்ளதாக தகவல்கள் வெளியாகியுள்ளன. இந்த சம்பவம் (30.04.2026) பெரும் அதிர்ச்சியை ஏற்படுத்திய நிலையில், குறித்த அதிகாரி தமது வீட்டில் உயிரிழந்த நிலையில் கண்டெடுக்கப்பட்டதாக தெரிவிக்கப்படுகிறது.

இந்த அதிகாரி, குறித்த சைபர் மோசடி விவகாரத்துடன் தொடர்புடையவராக விசாரணைக்கு உட்படுத்தப்பட்டிருந்ததாகவும், அண்மையில் அவர் மீது விசாரணை நடவடிக்கைகள் தீவிரமாக நடைபெற்றதாகவும் கூறப்படுகிறது. ஆரம்ப தகவல்களின் படி, இந்த சம்பவம் இதயஅதிர்ச்சி காரணமாக ஏற்பட்டிருக்கலாம் என சந்தேகிக்கப்படுகின்றது. எனினும், சம்பவத்தின் முழுமையான பின்னணி குறித்து அதிகாரிகள் மேலதிக விசாரணைகளை முன்னெடுத்து வருகின்றனர்.

இந்த நிகழ்வு, நாட்டில் நடைபெற்று வரும் சைபர் குற்ற விசாரணைகளின் தீவிரத்தையும் அதன் தாக்கத்தையும் வெளிப்படுத்துகிறது. சம்பவம் தொடர்பான உண்மைகள் வெளிச்சத்துக்கு வருமா என்ற எதிர்பார்ப்பு நிலவுவதுடன், பொதுமக்கள் மற்றும் அரசியல் தரப்பினரிடையே பல கேள்விகளையும் எழுப்பியுள்ளது.