மட்டக்களப்பில் பயங்கரம்- ஆட்டோ ஓட்டுநருக்கு மயக்க மருந்து அடித்து காட்டில் வீசிய கொள்ளையர்கள்.!

மட்டக்களப்பு வாழைச்சேனை பகுதியில் வாடகை ஆட்டோ ஓட்டுநரை மயக்கமருந்து தெளித்து காட்டுக்குள் வீசி, அவரிடமிருந்த நகை மற்றும் பணம் கொள்ளையடிக்கப்பட்ட சம்பவம் பரபரப்பை ஏற்படுத்தியுள்ளது. பூநொச்சிமுனையைச் சேர்ந்த 62 வயது ஆட்டோ ஓட்டுநர் ஒருவரே இந்த சம்பவத்தில் பாதிக்கப்பட்டுள்ளார். வாழைச்சேனை வரை செல்ல வேண்டும் எனக் கூறிய பயணி ஒருவர் ஆட்டோவை வாடகைக்கு எடுத்துச் சென்றதாக தெரிவிக்கப்படுகிறது.

மாலை நேரத்தில் ஆட்டோ எடுத்துச் சென்ற நபர், ஓட்டுநரின் முகத்தில் மயக்கமருந்து தெளித்து அவரை நிலைகுலையச் செய்ததாக ஆரம்பகட்ட விசாரணைகள் தெரிவிக்கின்றன. பின்னர் ரிதிதென்னை காட்டுப் பகுதியில் ஓட்டுநர் மயக்க நிலையில் ஆட்டோவுக்குள் கிடந்ததாகவும், அவரிடமிருந்த தங்க மோதிரம், பணம் மற்றும் மொபைல் போன் ஆகியவை கொள்ளையடிக்கப்பட்டதாகவும் கூறப்படுகிறது. இரவு நேரமாகியும் வீடு திரும்பாததால் குடும்பத்தினர் காவல்துறையில் புகார் அளித்திருந்தனர்.

அடுத்த நாள் காலை மீட்கப்பட்ட ஓட்டுநர் தற்போது மட்டக்களப்பு போதனா வைத்தியசாலையில் சிகிச்சை பெற்று வருகிறார். இந்த சம்பவம் தொடர்பில் மட்டக்களப்பு மற்றும் வாழைச்சேனை பொலிஸார் இணைந்து விசாரணைகளை தீவிரப்படுத்தியுள்ளனர். வாகன ஓட்டுநர்களை இலக்காகக் கொண்டு நடக்கும் இத்தகைய திட்டமிட்ட கொள்ளைகள் குறித்து பொதுமக்கள் எச்சரிக்கையுடன் இருக்குமாறு அறிவுறுத்தப்பட்டுள்ளது.