மதுபானசாலை அருகே கொடூரம்; பெண் வியாபாரி மீது ஹெல்மெட் தாக்குதல்.!

இராக்குவானை மாதம்பே சந்தியில் உள்ள மதுபானசாலை அருகே அசைவ சிற்றுண்டி கடை நடத்தி வந்த பெண் ஒருவர் மீது இளைஞர் ஒருவரால் ஹெல்மெட்டால் தாக்குதல் நடத்தப்பட்ட சம்பவம் அதிர்ச்சியை ஏற்படுத்தியுள்ளது. சம்பவம் இடம்பெற்ற போது கடையில் வியாபாரம் நடைபெற்றுக் கொண்டிருந்ததாகவும், அங்கு வந்த இளைஞருடன் பணப் பரிமாற்றம் தொடர்பாக ஏற்பட்ட வாக்குவாதம் பின்னர் வன்முறையாக மாறியதாகவும் தெரிவிக்கப்படுகிறது.

வாக்குவாதத்தின் போது ஆத்திரமடைந்த இளைஞர், தன்னிடம் இருந்த ஹெல்மெட்டை பயன்படுத்தி குறித்த பெண்ணின் தலை மற்றும் முகப் பகுதியில் தாக்குதல் நடத்தியதாக கூறப்படுகிறது. தாக்குதலில் படுகாயமடைந்த பெண்மணி, அருகிலிருந்தவர்களின் உதவியுடன் உடனடியாக மீட்கப்பட்டு கஹவத்தை ஆதார மருத்துவமனையில் அனுமதிக்கப்பட்டுள்ளார். அவர் தொடர்ந்து சிகிச்சை பெற்று வருவதாக தகவல்கள் தெரிவிக்கின்றன.

தாக்குதலை மேற்கொண்ட சந்தேகநபர் சம்பவ இடத்திலிருந்து தப்பிச் சென்றுள்ள நிலையில், அவரை கைது செய்ய இராக்குவானை பொலிஸார் விசாரணைகளை தீவிரப்படுத்தியுள்ளனர். இந்த சம்பவம் பொதுமக்கள் மத்தியில் கவலையை ஏற்படுத்தியுள்ளதுடன், வன்முறைச் செயல்களுக்கு எதிராக கடுமையான சட்ட நடவடிக்கைகள் எடுக்கப்பட வேண்டும் என்ற கோரிக்கைகளும் எழுந்துள்ளன.