தனியார் வாகனங்களுக்கு கட்டாயப் பாதுகாப்புச் சான்றிதழ் இல்லை: மோட்டார் போக்குவரத்துத் திணைக்களம் விளக்கம்.

வாகனங்களின் வீதிப் பாதுகாப்பு மற்றும் தகுதிநிலையைச் சான்றளிக்கும் புதிய முறை தொடர்பில் மோட்டார் போக்குவரத்துத் திணைக்களம் விளக்கமளித்துள்ளது. முன்மொழியப்பட்டுள்ள முறை பொதுப் போக்குவரத்திற்கும் பொருட்களை ஏற்றிச் செல்வதற்கும் பயன்படுத்தப்படும் வர்த்தக வாகனங்களை மட்டுமே இலக்காகக் கொண்டுள்ளதாக தெரிவிக்கப்படுகிறது.

இந்தச் சான்றிதழ் முறை 2027ஆம் ஆண்டின் தொடக்கத்தில் அறிமுகப்படுத்தப்படலாம் என முன்னர் தெரிவிக்கப்பட்டிருந்தது. சுமார் 5,000 கிலோமீற்றர் பயணத்திற்குப் பிறகு அல்லது மூன்று மாத இடைவெளியில் வாகனங்களைப் பரிசோதிப்பது தொடர்பான முன்மொழிவுகளும் குறிப்பிடப்பட்டிருந்தன.

எனினும், இந்தத் திட்டம் தொடர்பான கலந்துரையாடல்கள் இன்னும் நடைபெற்று வருவதாகத் திணைக்களம் தெரிவித்துள்ளது. நடைமுறைப்படுத்தும் இறுதித் திகதி, பரிசோதனைத் தரநிலைகள் மற்றும் விண்ணப்ப நடைமுறைகள் அறிவிக்கப்படவில்லை. எனவே, இதனை ஏற்கெனவே நடைமுறைக்கு வந்த கட்டாயச் சட்டமாகக் கருதுவது தவறாகும்.