![](https://thekural.com/wp-content/uploads/2026/02/The.jpeg")
ஒரு இலங்கை யுவதி முகநூல் (Facebook) மூலம் சீனாவைச் சேர்ந்த இளைஞன் என அறிமுகமான நபருடன் ஏற்பட்ட ஆன்லைன் காதல் உறவின் பின்னணியில், 5 இலட்சம் ரூபாய் இழந்த சம்பவம் வெளிச்சத்திற்கு வந்துள்ளது. குறித்த நபர் தன்னை திருமணம் செய்ய இலங்கைக்கு வருவதாகவும், 25 இலட்சம் ரூபாய் பெறுமதியான பரிசுப் பொருட்களை அனுப்புவதாகவும் கூறிய நிலையில், அது தொடர்பான போலி ஆவணங்களையும் அனுப்பி நம்பிக்கையை ஏற்படுத்தியுள்ளார். பின்னர் “சுங்க வரி” செலுத்த வேண்டும் என கூறி பணம் கோரப்பட்டதாக தெரிவிக்கப்படுகிறது.
பார்சல் கொழும்பு விமான நிலையத்திற்கு வந்துள்ளதாகவும், அதை விடுவிக்க 5 இலட்சம் ரூபாய் அவசரமாக செலுத்த வேண்டும் என காதலன் கூறியதை நம்பி, யுவதியும் அவரது குடும்பமும் தங்க நகைகளை அடகு வைத்து மற்றும் கடன் பெற்று பணம் அனுப்பியுள்ளனர். பணம் அனுப்பப்பட்ட பின்னர், சம்பந்தப்பட்ட முகநூல் கணக்கு மற்றும் வாட்ஸ்அப் தொடர்புகள் அனைத்தும் திடீரென முடக்கப்பட்டதாகவும் தெரிவிக்கப்பட்டுள்ளது. இதன் மூலம் இது ஒரு ஒழுங்கமைக்கப்பட்ட ஆன்லைன் காதல் மோசடி என சந்தேகிக்கப்படுகிறது.
இந்த சம்பவம் தொடர்பாக பாதிக்கப்பட்ட குடும்பத்தினர் அளித்த முறைப்பாட்டின் அடிப்படையில் குற்றப் புலனாய்வுத் திணைக்களம் (CID) மற்றும் கணினி குற்றப் புலனாய்வுப் பிரிவு (CCID) விசாரணைகளை ஆரம்பித்துள்ளன. பணம் அனுப்பப்பட்ட உள்ளூர் வங்கிக் கணக்கு மற்றும் இதன் பின்னணியில் உள்ள சர்வதேச மோசடி குழுக்கள் தொடர்பாக தீவிர விசாரணை நடைபெற்று வருவதாக தெரிவிக்கப்பட்டுள்ளது.
