துப்பாக்கியுடன் இளம்பெண்ணை கடத்த முயன்ற இருவர் கைது.!!

கொழும்பு புறநகர் பகுதியான மத்தேகொடையில் 20 வயதுடைய இளம்பெண்ணை துப்பாக்கி முனையில் கடத்த முயன்ற சம்பவம் பெரும் பரபரப்பை ஏற்படுத்தியுள்ளது. பாதுக்கை பகுதியைச் சேர்ந்த 30 வயதுடைய நபர் ஒருவர், கடந்த மூன்று ஆண்டுகளாக குறித்த யுவதியுடன் காதல் தொடர்பில் இருந்ததாகவும், பின்னர் அவர் ஏற்கனவே திருமணமானவர் மற்றும் ஒரு குழந்தையின் தந்தை என்பதும் தெரியவந்ததாகவும் தெரிவிக்கப்படுகிறது. இந்த விவகாரத்தால் யுவதியின் குடும்பத்தினர் அந்த உறவுக்கு எதிர்ப்பு தெரிவித்திருந்தனர்.

இந்த நிலையில், கடந்த 8ஆம் திகதி காலை குறித்த நபர் தனது 25 வயதுடைய நண்பருடன் காரில் வந்து, துப்பாக்கியைக் காட்டி யுவதியை வலுக்கட்டாயமாக கடத்த முயன்றதாக பொலிஸார் தெரிவித்துள்ளனர். சம்பவத்தை கண்ட உறவினர்கள் மற்றும் அக்கம் பக்கத்தினர் எதிர்ப்பு தெரிவித்ததையடுத்து, சந்தேகநபர்கள் அங்கிருந்து தப்பிச் சென்றுள்ளனர். பின்னர், பாதிக்கப்பட்ட குடும்பத்தினர் மத்தேகொட பொலிஸ் நிலையத்தில் முறைப்பாடு செய்ததைத் தொடர்ந்து, கஸ்கிஸ்ஸ குற்றப் புலனாய்வுப் பிரிவினர் விசாரணைகளை ஆரம்பித்தனர்.

விசாரணைகளின் அடிப்படையில், 30 வயதுடைய பிரதான சந்தேகநபரும் அவருக்கு உதவிய 25 வயதுடைய நண்பரும் கைது செய்யப்பட்டுள்ளனர். மேலும், கடத்தல் முயற்சிக்குப் பயன்படுத்தப்பட்ட கார் மற்றும் துப்பாக்கியும் பொலிஸாரால் கைப்பற்றப்பட்டுள்ளதாக தெரிவிக்கப்பட்டுள்ளது. இந்த சம்பவம் காதல் தொடர்புகளின் பெயரில் இடம்பெறும் ஏமாற்றங்கள் மற்றும் வன்முறைச் செயல்கள் குறித்து சமூகத்தில் மீண்டும் கவலைகளை ஏற்படுத்தியுள்ளது.