மெல்ல அழியும் பண்பாட்டின் அடையாளம் – ஆவுரோஞ்சிக் கல்

அழிந்து வரும் ஆவுரோஞ்சிக் கல் – யாழ்ப்பாணத்தில் மறைந்து வரும் பாரம்பரியச் சின்னம்.

தமிழர் கிராமிய வாழ்க்கையின் ஒரு முக்கிய அடையாளமாக விளங்கிய ஆவுரோஞ்சிக் கற்கள் (ஆ உரோஞ்சும் கல்), இன்றைய காலத்தில் மெதுவாக அழிந்து வரும் நிலை காணப்படுகிறது.

மாடுகள் நீர் அருந்திய பின் தங்களது உடலில் ஏற்படும் நமைச்சல் மற்றும் சுனைப்பைத் தீர்க்க, அவை தங்களைத் தேய்த்துக்கொள்ளும் வகையில், இந்தக் கற்கள் தெருவோர நீர்த் தொட்டிகள், கிணறுகள், கேணிகள் மற்றும் மடங்களுக்கு அருகில் அமைக்கப்பட்டிருந்தன. இது மனிதன் மற்றும் மிருகம் இணைந்து வாழ்ந்த தமிழர் வாழ்க்கை முறையின் சிறந்த எடுத்துக்காட்டாகக் கருதப்படுகிறது.

வரலாற்று ஆதாரங்களின் அடிப்படையில், குறிப்பாக 17ஆம் நூற்றாண்டில் யாழ்ப்பாணம் உள்ளிட்ட ஈழத் தமிழர் வாழ்ந்த பகுதிகளில், இத்தகைய கல் அமைப்புகள் பரவலாக பயன்படுத்தப்பட்டதாகக் கூறப்படுகிறது. அக்காலத்தில் மிருக நலனுக்கும் சமமான முக்கியத்துவம் வழங்கப்பட்டதன் சான்றாக இவை பார்க்கப்படுகின்றன.

இன்றைய நிலையில், நகரமயமாக்கல் மற்றும் இயந்திர விவசாய முறைகளின் அதிகரிப்பு காரணமாக, ஆவுரோஞ்சிக் கற்களின் பயன்பாடு குறைந்து, பல இடங்களில் அவை அழிந்து போயுள்ளன. எனினும், யாழ்ப்பாணத்தின் சில வயல்வெளிப் பகுதிகளில், குறிப்பாக பழமையான கேணிகளருகில், இவை இன்னும் காணப்படுகின்றன.

பண்பாட்டு ஆர்வலர்கள் மற்றும் சமூக செயற்பாட்டாளர்கள், இந்தக் கற்களை பாதுகாக்க வேண்டிய அவசியத்தை வலியுறுத்தி வருகின்றனர். இத்தகைய பாரம்பரியச் சின்னங்கள், தமிழர் கிராமிய அறிவு, சுற்றுச்சூழல் உணர்வு மற்றும் மிருக நல பார்வையை எதிர்கால தலைமுறைகளுக்கு எடுத்துச் செல்லும் முக்கிய வளங்களாகும் என அவர்கள் தெரிவிக்கின்றனர்.

ஆவுரோஞ்சிக் கற்களைப் பாதுகாப்பது என்பது – ஒரு பழமையான கலாச்சார அடையாளத்தை காப்பதற்குச் சமம் என நிபுணர்கள் சுட்டிக்காட்டுகின்றனர்.

✒️ சன்