ஹைதராபாத் அதிரடி – ராஜஸ்தான் 56 ஓட்டங்களில் வீழ்ச்சி.!!

ஹைதராபாத் உப்பல் ரஜிவ் காந்தி சர்வதேச விளையாட்டரங்கில் திங்கட்கிழமை (13) நடைபெற்ற ஐபிஎல் போட்டியில் சன்ரைசர்ஸ் ஹைதராபாத் அணி 56 ஓட்டங்கள் வித்தியாசத்தில் ராஜஸ்தான் ராயல்ஸ் அணியை வீழ்த்தியது.

முதலில் துடுப்பெடுத்தாடிய ஹைதராபாத் அணி 20 ஓவர்களில் 6 விக்கெட்டுகள் இழப்பிற்கு 216 ஓட்டங்களை குவித்தது. இஷான் கிஷான் 44 பந்துகளில் 91 ஓட்டங்களும், ஹென்றிச் க்ளாசன் 28 பந்துகளில் 40 ஓட்டங்களும் எடுத்து அணிக்கு வலுவான நிலையை ஏற்படுத்தினர்.இருவரும் மூன்றாவது விக்கெட்டில் 39 பந்துகளில் 98 ஓட்டங்களை சேர்த்து அணியை பலப்படுத்தினர்.

பின்னர் நிட்டிஷ் குமார் ரெட்டி (28) மற்றும் சலில் அரோரா (24*) ஆகியோரின் அதிரடி ஆட்டத்தால் கடைசி 5 ஓவர்களில் 62 ஓட்டங்கள் சேர்க்கப்பட்டது.

பதிலுக்கு விளையாடிய ராஜஸ்தான் அணி ஆரம்பத்திலேயே தடுமாறி முதல் 3 ஓவர்களில் 5 விக்கெட்டுகளை இழந்து 9 ஓட்டங்களிலேயே சிக்கியது. ப்ராஃபுல் ஹிங்கே தனது முதல் இரண்டு ஓவர்களில் 6 ஓட்டங்களுக்கு 4 விக்கெட்டுகளை வீழ்த்தி போட்டியை ஒருபுறமாக மாற்றினார். இது ஐபிஎல் வரலாற்றில் முதல் ஓவரில் 3 விக்கெட்டுகள் வீழ்த்திய சாதனையாகும்.

பின்னர் டொனவன் ஃபெரெய்ரா (69) மற்றும் ரவிந்த்ர ஜடேஜா (45) இணைந்து 122 ஓட்டங்கள் கூட்டணி அமைத்து அணியை மீட்டெடுக்க முயன்றாலும், ராஜஸ்தான் அணி 19 ஓவர்களில் 159 ஓட்டங்களுக்கு அனைத்து விக்கெட்டுகளையும் இழந்து தோல்வியடைந்தது.

இந்த வெற்றியால் ஹைதராபாத் அணியின் ஆட்டநிலை வலுவடைந்துள்ள நிலையில், தொடர்ச்சியாக 4 வெற்றிகள் பெற்றிருந்த ராஜஸ்தான் அணி முதல் தோல்வியை சந்தித்துள்ளது.