போலி சாரதி அனுமதிப்பத்திர மோசடி: பாதுகாப்பு உத்தியோகத்தர் உட்பட இருவர் கைது.!!

மோட்டார் போக்குவரத்து திணைக்களத்தின் உத்தியோகபூர்வ பாதுகாப்பு இலச்சினைகளை பயன்படுத்தி போலி சாரதி அனுமதிப்பத்திரங்களை விநியோகித்து வந்த பாதுகாப்பு உத்தியோகத்தர் ஒருவர் உட்பட இருவர் கைது செய்யப்பட்டுள்ளனர்.

ஹோமாகம மற்றும் புளத்கொஹுபிட்டிய பகுதிகளைச் சேர்ந்த 34 மற்றும் 28 வயதுடைய இவர்கள், வேரஹெர பகுதியில் உள்ள திணைக்களத்திற்கு வரும் நபர்களை ஏமாற்றி இந்த மோசடியில் ஈடுபட்டதாக தெரிவிக்கப்பட்டுள்ளது.

பொலிஸ் உத்தியோகத்தர் ஒருவர் வாடிக்கையாளர் போல வேடமிட்டு 10,000 ரூபாவிற்கு அனுமதிப்பத்திரம் பெறச் சென்றபோது பிரதான சந்தேகநபர் சிக்கியுள்ளார்.

கைது செய்யப்பட்டவர்களில் ஒருவரான பாதுகாப்பு உத்தியோகத்தரிடமிருந்து அனுமதிப்பத்திரங்களில் பயன்படுத்தப்படும் 9 உத்தியோகபூர்வ பாதுகாப்பு ஸ்டிக்கர்கள் கைப்பற்றப்பட்டுள்ளன. இந்தச் சம்பவம் அதிகாரப்பூர்வ முறைகளை தவறாக பயன்படுத்திய மோசடி எனப் பொலிஸார் குறிப்பிட்டுள்ளனர்.

இந்த கைது நடவடிக்கையால் இதுபோன்ற போலி அனுமதிப்பத்திர வலையமைப்புகள் குறித்து மேலதிக தகவல்கள் வெளிவரும் வாய்ப்பு உள்ளது. பொதுமக்கள் அதிகாரப்பூர்வ சேவைகளை பெறும் போது எச்சரிக்கையுடன் இருக்க வேண்டும் எனவும், சம்பவம் தொடர்பான மேலதிக விசாரணைகள் தொடர்ந்து நடைபெற்று வருவதாகவும் பொலிஸார் தெரிவித்துள்ளனர்.