தமிழக தேர்தல்: பெரம்பூர்–திருச்சி கிழக்கு இரண்டு தொகுதிகளில் விஜய் போட்டி. 

எதிர்வரும் தமிழக சட்டப்பேரவைத் தேர்தலில் நடிகர் விஜய் தலைமையிலான தமிழக வெற்றி கழகம் தனித்து களம் காணும் நிலையில், அவர் இரண்டு தொகுதிகளில் போட்டியிடுவதாக அறிவித்துள்ளார்.

ஏப்ரல் 23ஆம் திகதி நடைபெறவுள்ள 234 தொகுதிகளுக்கான தேர்தலை முன்னிட்டு, சென்னையில் நடைபெற்ற வேட்பாளர் அறிமுக நிகழ்வில் விஜய், பெரம்பூர் மற்றும் திருச்சி கிழக்கு தொகுதிகளில் போட்டியிடுவதாக தெரிவித்துள்ளார். மேலும், இன்று தொடங்கிய வேட்பு மனு தாக்கல் செயல்முறையில், பெரம்பூர் தொகுதிக்கான மனுவை அவர் தாக்கல் செய்துள்ளார்.

இந்தத் தேர்தலில் தமிழக வெற்றி கழகம் அனைத்து 234 தொகுதிகளிலும் போட்டியிடுகிறது. கட்சியின் வேட்பாளர்கள் பட்டியலும் வெளியிடப்பட்டுள்ள நிலையில், செங்கோட்டையன் கோபிசெட்டிபாளையம், பொதுச் செயலாளர் புஸ்ஸி ஆனந்த் தி.நகர், ஆதவ் அர்ஜுனா வில்லிவாக்கம் போன்ற முக்கிய தலைவர்களும் போட்டியிடுகின்றனர்.

விஜய் இரண்டு தொகுதிகளில் போட்டியிடும் முடிவு குறித்து விமர்சனங்கள் எழுந்துள்ள போதிலும், முன்னாள் முதல்வர் ஜெயலலிதா உள்ளிட்ட தலைவர்கள் கடந்த காலங்களில் இரண்டு தொகுதிகளில் போட்டியிட்ட முன்னுதாரணங்கள் இருப்பதாக அரசியல் விமர்சகர்கள் சுட்டிக்காட்டுகின்றனர்.

தமிழக வெற்றி கழகத்தின் முதல் சட்டப்பேரவைத் தேர்தலாக அமைந்துள்ள இந்தப் போட்டி, வாக்காளர்கள் மற்றும் அரசியல் வட்டாரங்களில் அதிக கவனத்தை ஈர்த்துள்ளது.

இளம் வாக்காளர்களிடையே ஆதரவு அதிகரித்து வருவதாகக் கூறப்படும் நிலையில், தேர்தல் முடிவுகள் குறித்து உறுதியான கணிப்புகளை முன்வைப்பது கடினமாக உள்ளது. இதனிடையே, திருச்சி கிழக்கு தொகுதிக்கான வேட்பு மனுவை ஏப்ரல் 2ஆம் திகதி தாக்கல் செய்ய விஜய் திட்டமிட்டுள்ளார்.