ரூ.35 கோடிக்கும் அதிக பெறுமதியான  போதைப்பொருளுடன் கனேடிய யுவதி கைது.!!

கட்டுநாயக்க பண்டாரநாயக்க சர்வதேச விமான நிலையத்தில் (BIA) [23.06.2026] இரவு மேற்கொள்ளப்பட்ட விசேட சோதனையின் போது, சுமார் ரூ.35 கோடிக்கும் அதிக பெறுமதியான ஹஷிஷ் (Hashish) போதைப்பொருளுடன் 18 வயதுடைய கனேடிய யுவதி ஒருவர் கைது செய்யப்பட்டுள்ளார். இலங்கைச் சுங்கப்பிரிவின் போதைப்பொருள் கட்டுப்பாட்டுப் பிரிவினர் (NCU) மேற்கொண்ட சோதனையிலேயே இந்த கைது இடம்பெற்றதாக அதிகாரிகள் தெரிவித்துள்ளனர்.

தகவல்களின்படி, குறித்த யுவதி கனடாவின் டொராண்டோ நகரிலிருந்து துபாய் ஊடாக எமிரேட்ஸ் விமான சேவையின் EK 648 விமானத்தில் இலங்கையை வந்தடைந்துள்ளார். சந்தேகத்தின் அடிப்படையில் அவரது இரண்டு பயணப் பொதிகள் பரிசோதிக்கப்பட்டபோது, அவற்றின் உட்பகுதிகளில் சூட்சுமமாக மறைத்து வைக்கப்பட்டிருந்த 35.265 கிலோகிராம் ஹஷிஷ் போதைப்பொருள் கண்டுபிடிக்கப்பட்டது. கைப்பற்றப்பட்ட போதைப்பொருளின் தெரு சந்தை பெறுமதி ரூ.352.65 மில்லியன் என மதிப்பிடப்பட்டுள்ளது.

கைது செய்யப்பட்ட யுவதியை மேலதிக விசாரணைகளுக்காக பொலிஸ் போதைப்பொருள் ஒழிப்புப் பிரிவிடம் (PNB) ஒப்படைக்க நடவடிக்கை எடுக்கப்பட்டுள்ளதாக சுங்க அதிகாரிகள் தெரிவித்துள்ளனர். இந்த போதைப்பொருள் இலங்கைக்காக கொண்டு வரப்பட்டதா அல்லது வேறு நாட்டிற்கு கடத்தப்பட இருந்ததா என்பதுடன், இதன் பின்னணியில் சர்வதேச கடத்தல் வலையமைப்பு உள்ளதா என்பது குறித்தும் அதிகாரிகள் தீவிர விசாரணைகளை முன்னெடுத்து வருகின்றனர்.