ரூ.68000 இற்கு மதுபான விருந்து; தொலைந்த ATM அட்டையை கண்டெடுத்த நபர் குதூகலம்.!!

கிளிநொச்சி பொதுச் சந்தையில் தேனீர் கடை நடத்தி வந்த ஒருவரின் ATM அட்டை தொலைந்த நிலையில், அதை கண்டெடுத்த நபர் உரியவரிடம் ஒப்படைக்காமல் பயன்படுத்தி ரூ. 68,796 வரை பணத்தை மோசடி செய்த சம்பவம் அதிர்ச்சியை ஏற்படுத்தியுள்ளது. காலை 8:09 மணி முதல் பிற்பகல் 3:02 மணி வரை ஒரே நாளில் இந்த தொகை முழுவதும் மதுபான செலவுக்காக பயன்படுத்தப்பட்டதாக தெரிவிக்கப்படுகிறது.

குறித்த நபர் ஒரே மதுபானசாலையில் தொடர்ந்து மதுபானம் அருந்தியதுடன், பிறருக்கும் வாங்கிக் கொடுத்து பணத்தை செலவழித்துள்ளார். மேலும் காசாளருக்குக் கூட சிறிய தொகையை டிப்ஸாக வழங்கியதாகவும் தகவல்கள் வெளியாகியுள்ளன. இதனால், தொலைந்த ATM அட்டையின் மூலம் ஒருவர் கடுமையாக உழைத்து சம்பாதித்த பணம் முற்றிலும் வீணாக்கப்பட்டுள்ளதாக கூறப்படுகிறது.

இந்த மோசடி சம்பவம், தேனீர் கடை உரிமையாளர் வங்கியில் அட்டை தொலைந்ததை அறிவித்தபோது வெளிச்சத்துக்கு வந்தது. பின்னர் வங்கி மற்றும் பொலிஸார் இணைந்து மேற்கொண்ட விசாரணையில், சம்பந்தப்பட்ட மதுபானசாலையின் CCTV காட்சிகள் மூலம் குறித்த நபர் அடையாளம் காணப்பட்டு கைது செய்யப்பட்டுள்ளார். ATM அட்டைகளை பாதுகாப்பாக வைத்திருக்க வேண்டிய அவசியம் குறித்து இந்த சம்பவம் மீண்டும் எச்சரிக்கையாக பார்க்கப்படுகிறது.