ரமித ரம்புக்வெல்ல சொத்துக் குவிப்பு வழக்கு: கோடிக்கணக்கான வீடு வாங்கலில் புதிய சாட்சிகள்!

முன்னாள் சுகாதார அமைச்சர் கெஹெலிய ரம்புக்வெல்லவின் மகனும் முன்னாள் தனிப்பட்ட செயலாளருமான ரமித ரம்புக்வெல்லவுக்கு எதிரான 276 மில்லியன் ரூபா சொத்துக் குவிப்பு வழக்கில், செவ்வாய்க்கிழமை (24) கொழும்பு மேல் நீதிமன்றில் சாட்சியங்கள் பதிவு செய்யப்பட்டன. நீதிபதி ரஷாந்த கொடவெல முன்னிலையில் விசாரணை நடைபெற்றதுடன், இலஞ்ச ஊழல் விசாரணை ஆணைக்குழுவினால் தாக்கல் செய்யப்பட்ட இந்த வழக்கில் 2ஆவது மற்றும் 3ஆவது சாட்சியாளர்கள் சாட்சியமளித்தனர்.

சாட்சியங்களின்படி, கொள்ளுப்பிட்டி கெபிடல் டவர் சொகுசு குடியிருப்பில் தலா 65 மில்லியன் ரூபா மதிப்புள்ள இரண்டு வீடுகளை ரமித ரம்புக்வெல்ல வாங்கியுள்ளதாக தெரிவிக்கப்பட்டது. மேலும் வரித் தொகையை குறைக்க வீட்டு பெறுமதியை கொள்முதல் ஆவணங்களில் குறைத்து குறிப்பிடுமாறு அவர் கோரியதாக சாட்சியாளர்கள் தெரிவித்தனர். வங்கி வழியாக பணம் வைப்பு செய்ய முயன்றபோது தேவையான ஆவணங்கள் இல்லாததால் மறுக்கப்பட்டு, பின்னர் மேலாளர் அலுவலகத்தில் பணம் கைமாற்றம் செய்யப்பட்டதாகவும் சாட்சிகள் கூறினர்.

2022 ஜனவரி முதல் 2023 செப்டம்பர் 14 வரை சுமார் 296 மில்லியன் ரூபா பெறுமதியான சொத்துக்களை சேர்த்துள்ளதாகவும், அதில் பெரும்பகுதி சொத்துக்களின் வருவாய் மூலத்தை விளக்கத் தவறியுள்ளதாகவும் குற்றச்சாட்டு உள்ளது. மேலும் அரசாங்க வாகனங்களுக்கு முறையற்ற எரிபொருள் கொடுப்பனவு பெற்றது உள்ளிட்ட குற்றச்சாட்டுகளும் முன்வைக்கப்பட்டுள்ளன. 86 சாட்சியாளர்கள் அடங்கிய இந்த வழக்கு மேலதிக விசாரணைக்காக மே 8ஆம் திகதிக்கு ஒத்திவைக்கப்பட்டுள்ளது.