பெண் தொழிலாளர்களுக்கு இரவு நேரப் பணி: புதிய பாதுகாப்பு விதிகள்.!

 இரவு நேரத்தில் பணிக்கு அமர்த்தப்படும் பெண்களுக்கான விதிமுறை தொடர்பில் அரசு புதிய நடவடிக்கை எடுத்துள்ளது. அந்தவகையில், 18 வயதுக்கு மேற்பட்ட பெண் துப்புரவு பணியாளர்கள் மற்றும் உணவு சேவை ஊழியர்களை மாலை 6:00 மணி முதல் காலை 6:00 மணி வரை பணி அமர்த்துவது தொடர்பான அதிவிசேட வர்த்தமானி அறிவிப்பு வெளியிடப்பட்டுள்ளது.

இந்த வர்த்தமானி தொழில் அமைச்சர் வைத்தியர் அனில் ஜெயந்த பெர்னாண்டோவின் கையொப்பத்தின் கீழ் வெளியிடப்பட்டது. இருப்பினும் இரவு நேர வேலைவாய்ப்புடன் தொடர்புடைய சாத்தியமான பிரச்சனைகளிலிருந்து தொழிலாளர்களைப் பாதுகாக்க வடிவமைக்கப்பட்ட உறுதியான நிபந்தனைகளுடன் இந்த அனுமதி வழங்கப்பட்டுள்ளது.

வர்த்தமானியின்படி, பணி நேரத்தின் போது அல்லது அதற்குப் பிறகு பணியாளருக்கு பொருத்தமான தங்குமிடம் அல்லது போக்குவரத்து வசதிகளை முதலாளி வழங்க வேண்டும். இரவில் கடமைகள் முடிவடையும் போது பணியாளரின் வீட்டிற்கு பாதுகாப்பான போக்குவரத்தை உறுதி செய்தல் ஆகியவை இதில் அடங்கும்.

கூடுதலாக, இந்த ஊழியர்களின் உடல்நலம், பாதுகாப்பு மற்றும் பொது நலனுக்கு முதலாளி பொறுப்பேற்கிறார் என்றும் அந்த வர்த்தமானி அறிவித்தலில் குறிப்பிடப்பட்டுள்ளது.