பிற்பகல் இடியுடன் மழை வாய்ப்பு – பல மாகாணங்களுக்கு வளிமண்டலவியல் திணைக்கள எச்சரிக்கை

மேல் மற்றும் சப்ரகமுவ மாகாணங்களிலும், காலி மற்றும் மாத்தறை மாவட்டங்களிலும் பிற்பகல் 2:00 மணிக்குப் பின்னர் சில இடங்களில் மழையோ அல்லது இடியுடன் கூடிய மழையோ பெய்யக்கூடும் என வளிமண்டலவியல் திணைக்களம் அறிவித்துள்ளது. நேற்று வெளியிடப்பட்ட இந்த முன்னறிவிப்பின் படி, நாட்டின் ஏனைய பகுதிகளில் பெரும்பாலும் வறண்ட வானிலை நிலவும் என தெரிவிக்கப்பட்டுள்ளது.

மேலும் மத்திய, சப்ரகமுவ மற்றும் ஊவா மாகாணங்களிலும், காலி மற்றும் மாத்தறை மாவட்டங்களிலும் காலை நேரங்களில் சில இடங்களில் பனிமூட்டமான நிலை காணப்படும் என எதிர்பார்க்கப்படுகிறது. இடியுடன் கூடிய மழை நேரங்களில் தற்காலிக பலத்த காற்று மற்றும் மின்னல் தாக்கங்கள் ஏற்படக்கூடும் என்பதால், அவற்றால் ஏற்படும் பாதிப்புகளை குறைக்க தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்கள் கேட்டுக்கொள்ளப்பட்டுள்ளனர்.

இதற்கிடையில், நாட்டைச் சூழவுள்ள கடல் பிராந்தியங்களில் பொதுவாக சீரான வானிலை நிலவும் எனவும் தெரிவிக்கப்பட்டுள்ளது. வடகிழக்கு திசையிலிருந்து வீசும் காற்றின் வேகம் மணிக்கு 20–30 கி.மீ. வரை இருக்கும் நிலையில், சில கடல் பகுதிகளில் இது 40 கி.மீ. வரை அதிகரிக்கக்கூடும். குறிப்பாக புத்தளத்திலிருந்து காங்கேசன்துறை மற்றும் மாத்தறையிலிருந்து பொத்துவில் வரையான கடல் பகுதிகள் இடைக்கிடையே ஓரளவு கொந்தளிப்பாக காணப்படும் எனவும் அறிவிக்கப்பட்டுள்ளது.