சுகாதார அமைச்சருக்கு மருத்துவர்கள் சவால்: “நேரடி விவாதத்திற்கு வாருங்கள்”.!

வைத்தியர்களின் இடமாற்றக் கோரிக்கைகளில் செவிசாய்க்காத சுகாதார அமைச்சர் நளிந்த ஜயதிஸ்ஸாவை அனைத்து ஊடகங்களின் முன்னிலும் நேரடி விவாதத்திற்கு வருமாறு அரச மருத்துவ அதிகாரிகள் சங்க செயலாளர் வைத்தியர் பிரபாத் சுகததாச சவால் விடுத்துள்ளார். இந்த கருத்தை அவர் வெள்ளிக்கிழமை (ஏப்ரல் 03) ஊடகங்களுக்கு கருத்து தெரிவிக்கும் போது வெளியிட்டார்.

இடமாற்றக் கட்டமைப்பு அமைச்சரின் நேரடி தலையீட்டால் சீர்குலைக்கப்பட்டுள்ளதாகவும், பயிற்சி முடித்த வைத்தியர்களுக்கான வெற்றிடப் பட்டியல் இடமாற்றச் சபையின் அனுமதியின்றி மாற்றப்பட்டுள்ளதாகவும் அவர் குற்றம் சாட்டினார்.

மேலும், விண்ணப்பிக்காத வைத்தியர்களின் சம்பளத்தை நிறுத்துவோம் என அமைச்சர் மிரட்டுவதாகவும் தெரிவித்தார். அதேவேளை, இந்த வெற்றிடப் பட்டியல் தவறானதும் ஊழல் நிறைந்ததுமானது என்பதால் அதற்கு விண்ணப்பிக்க வேண்டாம் என வைத்தியர்களிடம் கோரிக்கை விடுக்கப்பட்டதாகவும் கூறினார்.

இந்த நிலை தொடர்ந்தால் இலவச சுகாதார அமைப்பு பாதிக்கப்படும் அபாயம் உள்ளதாக எச்சரிக்கப்பட்டுள்ளது. அமைச்சரின் நடவடிக்கைகளுக்கு எதிராக அடுத்தகட்ட தொழிற்சங்க நடவடிக்கைகள் குறித்து அவசரக் கூட்டத்தில் தீர்மானிக்கப்படவுள்ளதாகவும் தெரிவிக்கப்பட்டுள்ளது.