காத்தான்குடியில் சிறுமிகள் தொடர்பான துஷ்பிரயோக குற்றச்சாட்டு; சந்தேகநபர் கைது, தந்தை உயிரிழப்பு.!!

மட்டக்களப்பு காத்தான்குடி பொலிஸ் பிரிவுக்குட்பட்ட பகுதியில் 12 வயது சிறுமி ஒருவர் பாலியல் துஷ்பிரயோகத்திற்கு உள்ளாக்கப்பட்டதாகக் கூறப்படும் சம்பவம் தொடர்பில் 54 வயதுடைய நபர் ஒருவர் கைது செய்யப்பட்டுள்ளார். இந்த சம்பவத்துடன் தொடர்புடைய விசாரணைகள் முன்னெடுக்கப்பட்டு வரும் நிலையில், பாதிக்கப்பட்டதாகக் கூறப்படும் சிறுமியின் தந்தை உயிரிழந்த சம்பவமும் பதிவாகியுள்ளது. சம்பவம் தொடர்பாக காத்தான்குடி பொலிஸார் மேலதிக விசாரணைகளை மேற்கொண்டு வருகின்றனர்.

பொலிஸாரின் ஆரம்பகட்ட விசாரணைகளின் படி, கைது செய்யப்பட்ட நபர் சிறுமியின் வீட்டிற்கு வழமையாகச் சென்று வந்துள்ளார். சம்பவம் இடம்பெற்றதாகக் கூறப்படும் நேரத்தில், சிறுமியின் பெற்றோர் வீட்டில் இல்லாத நிலையில் 12 வயது சிறுமியும் அவரது 10 வயது தோழியும் வீட்டில் இருந்ததாக தெரிவிக்கப்பட்டுள்ளது. இதன்போது 12 வயது சிறுமி பாலியல் துஷ்பிரயோகத்திற்கு உள்ளாக்கப்பட்டதாகவும், 10 வயது சிறுமியிடம் முறையற்ற வகையில் நடந்துகொள்ள முயற்சிக்கப்பட்டதாகவும் குற்றச்சாட்டு முன்வைக்கப்பட்டுள்ளது. பின்னர் இந்த விடயம் பாடசாலை ஆசிரியரின் கவனத்திற்கு கொண்டு செல்லப்பட்டதைத் தொடர்ந்து, சிறுமியின் தாயார் பொலிஸில் முறைப்பாடு செய்துள்ளார்.

முறைப்பாட்டின் அடிப்படையில் சந்தேகநபர் கைது செய்யப்பட்டதுடன், பாதிக்கப்பட்டதாகக் கூறப்படும் இரு சிறுமிகளும் மருத்துவ பரிசோதனைக்காக வைத்தியசாலையில் அனுமதிக்கப்பட்டுள்ளனர். இதற்கிடையில், தனது மகளுக்கு நேர்ந்ததாகக் கூறப்படும் சம்பவத்தால் மனவேதனைக்குள்ளான சிறுமியின் தந்தை உயிரிழந்த நிலையில் மீட்கப்பட்டுள்ளார். சம்பவத்தின் அனைத்து அம்சங்களையும் உள்ளடக்கி மேலதிக விசாரணைகள் தொடர்ந்தும் இடம்பெற்று வருகின்றன.