ஒரு பில்லியன் டொலரும், அழகான பெண்ணும் வேண்டும் – துருக்கிக்கு உகாண்டா இராணுவத் தளபதியின் வினோத கோரிக்கை!

சர்வதேச அரசியல் அரங்கில் பரபரப்பை ஏற்படுத்திய வினோதமான கோரிக்கையாக, உகாண்டா இராணுவத் தளபதி முஹூசி கைனருகபா துருக்கி நாடு தமக்கு 1 பில்லியன் அமெரிக்க டொலரும், அந்த நாட்டின் மிகவும் அழகான பெண்ணையும் திருமணம் செய்து தர வேண்டும் என தெரிவித்துள்ளார்.

இந்த கருத்துகளை அவர் தனது உத்தியோகபூர்வ எக்ஸ் பக்கத்தில் வெளியிட்டதுடன், சோமாலியாவில் உகாண்டா இராணுவம் பாதுகாப்பு நடவடிக்கைகளில் ஈடுபடுவதால் துருக்கி பொருளாதார பலன்களைப் பெறுகிறது என்பதற்கான இழப்பீடாகவே இந்த கோரிக்கை முன்வைக்கப்பட்டதாக கூறியுள்ளார்.

முஹூசி கைனருகபா, உகாண்டா ஜனாதிபதி யோவேரி முசெவேனியின் மகனாக இருப்பதுடன், எதிர்கால ஜனாதிபதியாகவும் கருதப்படுகிறார். அவர் தனது கோரிக்கை 30 நாட்களுக்குள் நிறைவேற்றப்படாவிட்டால் துருக்கியுடனான தூதரக உறவுகள் துண்டிக்கப்படும் என்றும் எச்சரித்துள்ளார்.

மேலும், துருக்கி ஏர்லைன்ஸ் விமானங்களுக்கு உகாண்டா வான்வெளியில் தடை விதிக்கப்படலாம் என்றும், கம்பாலாவில் உள்ள துருக்கிய தூதரகம் மூடப்படலாம் என்றும் தெரிவித்துள்ளார்.

இதேபோன்ற சர்ச்சை கருத்துகளை முன்வைத்தது இவருக்கு இது முதல் முறை அல்ல. 2022ஆம் ஆண்டு இத்தாலி பிரதமர் ஜோர்ஜியா மெலோனியை திருமணம் செய்ய 100 மாடுகளை வழங்க முன்வந்ததுடன், மறுத்தால் ரோம் நகரை கைப்பற்றுவதாகவும் கூறியிருந்தார்.

இந்த சமீபத்திய கோரிக்கை உலகளவில் கடும் விமர்சனங்களையும் அரசியல் விவாதங்களையும் தூண்டியுள்ள நிலையில், எதிர்காலத்தில் உகாண்டா–துருக்கி உறவுகள் எவ்வாறு மாறும் என்பது கவனிக்கப்படுகிறது.