அரசு வேலை வாங்கி தருவதாக கூறி ரூ.2.75 லட்சம் மோசடி: கணவன், மனைவிக்கு 2 ஆண்டுகள் சிறை.!

தூத்துக்குடி மாவட்டம் ஏரல் பகுதியில் அரசாங்க வேலை வாங்கித் தருவதாக கூறி ரூ.2.75 லட்சம் பணம் மோசடி செய்த தம்பதிக்கு எதிரான வழக்கில், குற்றவியல் நீதித்துறை நடுவர் நீதிமன்றம் எண்-IV செவ்வாய்க்கிழமை (24) தீர்ப்பு வழங்கியுள்ளது. இதில் பாலமுருகன் (எ) வானவில் பாலா (36) மற்றும் அவரது மனைவி குற்றவாளிகள் என அறிவிக்கப்பட்டுள்ளனர்.

2024ஆம் ஆண்டு, ஏரல் பகுதியைச் சேர்ந்த இருவரிடம் அரசு வேலை வழங்குவதாகக் கூறி பணம் பெற்ற இந்த தம்பதிக்கு எதிராக பாதிக்கப்பட்டவர்கள் அளித்த புகாரின் பேரில் மாவட்ட குற்றப்பிரிவு-1 பொலிஸார் வழக்கு பதிவு செய்து விசாரணை மேற்கொண்டனர். விசாரணை நிறைவடைந்த பின்னர் இறுதி அறிக்கை நீதிமன்றத்தில் தாக்கல் செய்யப்பட்டு, வழக்கு விசாரணை தொடர்ந்து நடைபெற்றது.

வழக்கை விசாரித்த நீதிபதி பாக்கியராஜ், குற்றம் நிரூபிக்கப்பட்டதையடுத்து இருவருக்கும் தலா 2 ஆண்டுகள் சிறைத் தண்டனையும் ரூ.4,000 அபராதமும் விதித்தார். இந்த வழக்கில் பங்கேற்ற பொலிஸ் அதிகாரிகள் மற்றும் அரசு தரப்பு வழக்கறிஞர் உள்ளிட்டவர்களை மாவட்ட எஸ்.பி. பாராட்டியுள்ளதுடன், இதுபோன்ற மோசடிகளுக்கு எதிராக கடுமையான சட்ட நடவடிக்கைகள் தொடரும் என எதிர்பார்க்கப்படுகிறது.