அபிஷேக் சர்மா சம்பவம்.. டெல்லி அணி தோல்வி.. ராகுல், ராணா ஆட்டம் வீண்

மும்பை: ஐபிஎல் 2026 போட்டியில் டெல்லி கேபிடல்ஸுக்கு எதிராக சன்ரைசர்ஸ் ஹைதராபாத் அணி அபார வெற்றி பெற்றது. இந்த ஆட்டத்தில் அபிஷேக் ஷர்மா 68 பந்துகளில் 10 பவுண்டரிகள் மற்றும் 10 சிக்ஸர்களுடன் ஆட்டமிழக்காமல் 135 ரன்கள் குவித்து அசத்தினார். அவரது அதிரடியான பேட்டிங்கால் ஹைதராபாத் அணி 20 ஓவர்களில் 2 விக்கெட் இழப்புக்கு 242 ரன்கள் என்ற பிரம்மாண்ட ஸ்கோரை எட்டியது.

அபிஷேக் ஷர்மாவின் சிறப்பான இன்னிங்சிற்கு உறுதுணையாக, ட்ராவிஸ் ஹெட் 37 ரன்களும், ஹென்ரிச் கிளாசன் ஆட்டமிழக்காமல் 37 ரன்களும் சேர்த்தனர். டெல்லி தரப்பில் கேப்டன் அக்ஸர் படேல் மட்டுமே விக்கெட்டை வீழ்த்தி எதிரணி ரன் குவிப்பை ஓரளவு கட்டுப்படுத்தினார்.

டாஸ் வென்ற டெல்லி கேபிடல்ஸ் கேப்டன் அக்ஸர் படேல் முதலில் பந்துவீச முடிவு செய்தார். இந்த 2026 ஐபிஎல் சீசனில் டெல்லி கேபிடல்ஸ் அணி நிலையற்ற ஆட்டத்தை வெளிப்படுத்தி வருகிறது. பந்துவீச்சு மற்றும் பேட்டிங்கில் உள்ள சில குறைபாடுகள் அவர்களுக்கு பின்னடைவை ஏற்படுத்தின. ஹைதராபாத்துக்கு எதிரான ஆட்டத்திலும், ஒரு ஆரம்ப விக்கெட்டை இழந்த பிறகு, கே.எல். ராகுல் மற்றும் நிதிஷ் ராணா இடையே 86 ரன்கள் பார்ட்னர்ஷிப் அமைந்தது, மேலும் நிதிஷ் ராணா ஒரு வேகமான அரை சதம் அடித்தார்.

இருப்பினும், 107 ரன்களுக்கு ஒரு விக்கெட் என்ற வலுவான நிலையில் இருந்து, அதுவே சட்டென்று 107 ரன்களுக்கு 4 விக்கெட்டுகள் என சரிந்தது. அதன்பின்னர், சமீர் ரிஸ்வி மற்றும் டிரிஸ்டன் ஸ்டப்ஸ் ஆகியோர் 50 ரன்களுக்கும் அதிகமான பார்ட்னர்ஷிப்பை அமைத்தாலும், ரன்ரேட் அழுத்தம் காரணமாக விக்கெட்டுகள் தொடர்ந்து வீழ்ந்தன. இறுதியாக, டெல்லி 200 ரன்களை எட்ட முடியாமல் தடுமாறியது.

சன்ரைசர்ஸ் ஹைதராபாத் தனது வேகப்பந்து வீச்சாளர்களை மாற்றி அமைத்து வருகிறது. இந்த போட்டியில் பிரஃபுல் ஹிங்கிற்கு பதிலாக தில்ஷான் மதுஷங்கா சேர்க்கப்பட்டார். கடந்த மூன்று ஆட்டங்களாக பந்துவீச்சில் செய்யப்பட்ட மாற்றங்கள் நல்ல பலனைத் தந்துள்ளன என்பதை இந்த வெற்றியும் உறுதிப்படுத்தியுள்ளது.

ஈஷான் மாலிங்கா சன்ரைசர்ஸ் அணியின் முன்னணி வேகப்பந்து வீச்சாளராக மாறி, இந்த ஆட்டத்தில் 4 விக்கெட்டுகளை வீழ்த்தி மிரட்டினார். தில்ஷான் மதுஷங்காவும் ஆரம்பத்தில் சிறப்பாக செயல்பட, சகிப் ஹுசைன் பல்வேறு காலகட்டங்களில் பந்துவீசி தனது திறமையை வெளிப்படுத்தினார்.

ஹர்ஷ் தூபேவின் பந்துவீச்சு இறுதி ஓவரில் பெரும் தாக்கத்தை ஏற்படுத்தியது. அவர் 2 ஓவர்களில் 11 ரன்கள் மட்டுமே கொடுத்து 3 விக்கெட்டுகளை கைப்பற்றினார். இது போட்டியை ஹைதராபாத் அணிக்கு சாதகமாக முடிப்பதில் முக்கிய பங்காற்றியது. இதன் மூலம் ஐதராபாத் அணி 47 ரன்கள் வித்தியாசத்தில் மகத்தான வெற்றியைப் பதிவு செய்தது.

டெல்லி கேபிடல்ஸை 47 ரன்கள் வித்தியாசத்தில் வீழ்த்திய சன்ரைசர்ஸ் ஹைதராபாத், நடப்பு ஐபிஎல் தொடரில் தொடர்ச்சியாக மூன்றாவது வெற்றியை பதிவு செய்தது. இதன் மூலம், 7 போட்டிகளில் 4 வெற்றிகளுடன் புள்ளிப்பட்டியலில் முன்னேறி வருகிறது.மறுபுறம், டெல்லி கேபிடல்ஸ் அணியின் நிலையற்ற ஆட்டம் தொடர்கிறது. அவர்கள் விளையாடிய 6 போட்டிகளில் 3 வெற்றிகள் மற்றும் 3 தோல்விகளை சந்தித்துள்ளனர்.